அருள்மிகு செல்வலலிதாம்பிகை அம்மன் திருக்கோயில், செல்லப்பிராட்டி -604 210. செஞ்சி, விழுப்புரம் மாவட்டம்.

+91- 99435 81914, 94440 67172 (மாற்றங்களுக்குட்பட்டவை)

காலை 6 மணி முதல் 11 மணி வரை, மாலை 4 மணி முதல் இரவு 8.30 மணி வரை திறந்திருக்கும்.

தசரதர் குழந்தை பாக்கியம் வேண்டி புத்திர காமேஷ்டி யாகம் நடத்தினார். யாகத்தின் பலனாக இராமபிரான் அவதரித்தார். இந்த யாகத்தை நடத்தி கொடுத்தவர் ரிஷ்யசிருங்க முனிவர். இவர் காஷ்யப முனிவரின் மகனான விபாண்டகருக்கு பிறந்தவர். இவரிடம் ஒரு கற்பலகை இருந்தது. அதை அம்பாளாகக் கருதி அவர் வழிபட்டார். இந்தப் பலகை எப்படியோ இந்த ஊருக்கு வந்துள்ளது. அதற்கு “லலித செல்வாம்பிகை” என்ற திருநாமம் சூட்டப்பட்டது.

பிற்காலத்தில், கற்பலகையைப் பிரதிட்டை செய்து, கீழே அம்பாள் விக்ரகம் வைக்கப்பட்டுள்ளது. ஆதிசங்கரர் காஞ்சிக்கு செல்லும் போது, அவருக்கு இத்தல அம்மன் காட்சி கொடுத்து வழி கூறியதாக கூறப்படுகிறது.

ரிஷ்யசிருங்கரின் விக்ரகமும் இங்குள்ளது.

கற்பலகையின் வடிவமைப்பு:

மூலவராக வணங்கப்படும் அம்மன் கற்பலகை வடிவில் இருக்கிறாள்.

ஒரு காலத்தில், கற்பலகைகளில் மந்திரங்களை எழுதிக் கடவுளாக வழிபட்டனர். எனவே, இத்தலம் காலத்தால் மிகவும் பழமையானதாகக் கருதப்படுகிறது.

கற்பலகை, 4 அடி உயரமும், செவ்வக வடிவமும் கொண்டது. பலகையில் 12 சதுரக்கட்டங்கள் உள்ளன. இந்தக் கட்டங்களைச் சுற்றி, உலக நாயகியான ஆதிபராசக்தியின் பீஜாட்சர மந்திரத்தின் சூட்சும எழுத்துக்கள் உள்ளன. நடுவில் திரிசூலம் உள்ளது. வலது மேல் பக்கத்தில் சூரியனும், இடது மேல் பக்கத்தில், சந்திரனும் பொறிக்கப்பட்டுள்ளன.

அருள்மிகு பொன்னியம்மன் கோவில், கொங்கரப்பட்டு, விழுப்புரம் மாவட்டம்
**************************************************************************************

விழுப்புரம் மாவட்டம் செஞ்சி தாலுகா கொங்கரப்பட்டில் 700 ஆண்டுகள் பழமை வாய்ந்த பொன்னியம்மன் சமேத பொன்னீசுவரர் கோவில் உள்ளது. இக்கோவிலில் உள்ள கர்பக்கிரகத்தில் பொன்னியம்மனின் சிரசில் சிவலிங்கம் உள்ளது. அத்துடன் அம்மன் வலது காதில் சிறு குழந்தையை அணிகலனாக அணிந்துள்ளார்.

கொங்கரப்பட்டு பொன்னியம்மன் கோவிலில் ஆண்டுக்கு ஒரு முறை அம்மன் மீது சூரிய ஒளி விழும் அபூர்வ நிகழ்ச்சி நடக்கும்.

பல ஆண்டுகள் சரிவர பராமரிக்கப்படாமல் இருந்த இக்கோவிலை கடந்த இரண்டு ஆண்டுகளுக்கு முன் புதுப்பித்து கும்பாபிஷேகம் நடந்தது.